s هذا الموضوع فتحته بسولف فيه

بسم الله الرحمن الرحيم

هذا الموضوع فتحته بسولف فيه

ايه بسولف ......!

واتمنى سوالفي تكون شاهده لي لاعلي

سوالفي اليوم غير .... والله غير

سوالفي اليوم عن امور اشوف اغلب الناس غافلين عنها

مع انه بمجرد التفكير فيها شيء مرعب شيء مايوصف

على بركة الله يالله بسولف ......

وترى قرقرتي واجد الله يعينكم علي

مير الي مالها خلق تقرأ او مستعجله ترجع للموضوع وقت ثاني ترى مب طاير والله بيجلس مرتز في ملفي

ذالحين من يجينا خبر فلان مات ... اول مانقول وش مات منه حادث ..؟

او نقول كيف مات ماكان يشكي من شيء ..!

واذا قالوا مات كذا فجاءه بدون سبب ... هنا ننصدم ومانصدق كيف مات كذا اكيد فيه شيء ..!!

الموت الفجائي هذا اغلب الناس ماتعترف به ..!

وياما ناس ماتوا وهم جالسين بين اهلهم وياما ناس ماتوا وهم نايمين وياما وياما

القلب عضله رقيقه وحساسه يحركها الله كيفما يشاء سبحانه ... ان شاء استمرت في النبض وان شاء اوقفها في لحظه ..!

جارتنا الله يرحمها ماتت وهي جالسه تتقهوى وسط الحريم مافيها شيء فجاءه مالت وطاحت يوم ارفعوها الحريم قد فاضت روحها

جار
خالتي توه في عز شبابه تغدى وراح ياخذ قيوله ووصى زوجته اذا اذن العصر
تقومه ويوم أذن جت تصحيه مايرد يافلان يافلان مايرد لفت وجهه وكانت الصاعقه

ولد عمتي شاب في مقتبل عمره كان يذاكره دخلوا عليه زملائه لقوه منكب على الكتاب رفعوه وأهـ من تلك الرفعه ..!

وكثير الامثله والله كثير بس ذالحين ناسيه ... والتقرير الطبي كاالعاده سكته قلبيه او ذبحه صدريه...!!

هادم اللذات ومفرق الجماعات يحصد من حوالينا وكل دقيقه وهو في بيت وحنا غافلين غافلين

اغرتنا الدنيا واشغلتنا انفسنا ... نسينا الموت لا لم ننساه بل نتناساه ...!!

ايه نتناساه ولانحب ان نذكره او احد يذكرنا به .... لانه امر يخيفنا امر يعكر علينا صفو حياتنا

امي الله يعطيها الصحه ياارب اذا شافت اصحاب الجرائم او المخدرات او الي يقتلون الاطفال الابرياء

تقول ذالحين ذولي مايعرفون الموت مايذكرون الي وراه ...دايم هذا كلام امي ..!

عاد اقول الا ياالغاليه يعرفونه ويذكرونه فيه انسان مايعرف الموت .. بس طاغين متجبرين اغوتهم انفسهم الاماره باالسؤء والعياذذ بالله

كثير اسمع اذا مات واحد مريض يقولون مات وارتاح او الموت راحه له من العذاب

هنا انا اشعر بغصه ... ادرك ان هناك جهل وجهل كبير يستوطن تفكير من يقول هاالكلام

لو كان يدركون ماهو الموت وماذا بعد الموت من حياه ... لم يقولوا هذا الكلام ..!!

مره كنت جالسه مع صديقاتي وكنا نسولف ونضحك وننكت وجلستنا وش زينها

فجاءه قلت لهن : بنات تتذكرون الموت ...؟

ضحكن وقالن لا مانذكره وشلونه كيف شكله .... طبعا يقالهن ينكتن

قلت لا عاد صدق يطري عليكم الموت ومابعد الموت ..؟؟

بعيدين استغفرن الله .... وقالت وحده منهن : انا دايما اتذكر القبر والحياه فيه ياربي ترحم ضعفنا

غرف وش وسعهن وبيت واسع وحوش لو يطفي علينا النور مانتحمل الظلام خمس دقايق ..

نختنق نتضايق ونسوي استنفار نشغل شموع او فانوس >>> ياقدمك بس

وكله كووم وضمة القبر كووم الي قال عنها رسول الله ان للقبر ضمه ....!!

اهـ ياربي رحمتك يقول الرسول عليه الصلاة والسلام ( ان للقبر لضمة لو كان احد منها ناجياً لكان سعد بن معاذ. )

يارب وسع لنا في قبورنا برحمتك واجعلها روضه من رياض الجنه ..!

قالت الثانيه لا تدرون انا وش افكر فيه افكر في الصراط المستقيم كيف نمر فيه ..؟

خلوني اكلمكم شوي عن الصراط ...؟؟

الصراط المستقيم

( وإن منكم إلا واردها كان علي ربك حتما مقضيا )

مواصفات الصراط :

1ـ أدق ( أرفع ) من الشعره

2 ـ أحد من السيف.

3 ـ شديد الظلمة تحته جهنم سوداء مظلمة "تكاد تمييز من الغيظ"

4 ـ حامل ذنوبك كلها مجسمه علي ظهرك ... فتجعل المرور بطيئا لأصحابها إذا كانت كثيرة والعياذ بالله أو سريعا كالبرق إذا كانت خفيفة

5 ـ لا يوجد نور فوق الصراط ......ولكن تضاء الأنوار لكل عبد علي قدر إيمانه ..!

لن يكون سوي مكانين الجنة والنار ولكي تصل إلي الجنة يجب أن تعدي جهنم فينصب جسر فوق جهنم إسمه "الصراط" بعرض جهنم

إذا مررت عليه وصلت لنهايته وجدت باب الجنة أمامك ورسول الله صلي الله عليه وسلم واقفا يستقبل أهل الجنة بالأحضان والأشواق.

قالت الثالثه انا افكر مابعد الحساب وتصفية الخلق خلاص ياجنه يانار كيف بنكون ..؟؟

يعني خلاص حاسب الله الخلق وجزاهم الي في الجنه في الجنه والي في النار في النار ......

كيف حالنا اذا كنا في الجنه يعني خلاص لانموت ولانجوع ولا نظمأ واعمارنا محدده لانكبر ولاننتغير ...

شيء مااقدر اتخيله في الجنه مالا عين رأت ولا اذن سمعت ولا خطر على قلب بشر قط

اما النار يارب حرم جلودنا على النار حنا ووالدينا وجميع المسلمين ياارب

نار
جهنم تعادل نار النار سبعين مره ... نار الدنيا لو تلسعنا لسعه بسيطه كوت
جلدنا وتورم وماننام من الالم ...فما بالنا بنار جهنم ...!!

نار جهنم يلقى فيها الكافر حتى يموت واذا مات احياه الله من جديد وهكذا على هذا المنوال .. مصيره خالد مخلد في النار والعياذ بالله

اما المسلم الذي عليه ذنوب يلقى في النار على قدر ذنوبه ..!!

منهم تلسعه ومنهم من يبقى فيها ايام .... ومنهم من يجلس فيها سنين

ومنهم من يجلس فيها حتى يكاد يفقد الامل في رحمة الله والجنه فاذا الله يخرجه ويلقيه في الجنه من بعد العذاب سبحان الله ...

وقالت الرابعه لا انا افكر كثير في اهوال يوم القيامه وكيف اشكالنا وقت قيام القيامه ..!

تدرين من شدتها الحامل يطيح ولدها من بطنها وهي ماتدري عنه

الناس يتراكضون عراه لااحد يلتفت للاخر من هول مايرون ...... الاب مايهمه ابنه والابن مايهمه أبيه ..!!

عاد انا هنا قلت لا انا تدرون وش الي دايم مشغلني وافكر فيه ..!

انه الموت اذا جاء مايستأذن منا ...!

يجي فجاءه بدون وعد ....... يعني ماندري متى نموت ولا باي ارض نموت ..!

نمشي على كف القدر ولاندري عن المكتوب ..!!

يعني تخيلي ماندري عن يومنا يمكن بعد سنه يمكن بعد شهر يمكن بعد اسبوع يمكن بعد يوم

يمكن بعد ساعه يمكن بعد نصف ساعه يعني في اي لحظه توقعي يومك ... امر مفزع صراحه ..!!

قالت وحده من صديقاتي تدرين احسن شيء ماندري عن يومنا راحه لنا ...

لاننا لو ندري مصيبه يعني تخيلي من ولدتي وانتي تعرفين متى بتموتين ...!!

اتوقع كل ماقرب الموعد راح نزداد خوف ويمكن نموت قبل موعدنا

سبحان الله ..........الله اخفى موعد موت كل شخص لحكمه يعلمها سبحانه ورحمه بعباده ...!!...

والله
يااخواتي حنا في غفله من امرنا .... وفرطنا في امور ديننا ....وطلمنا
انفسنا وان لم يرحمنا الله ويشملنا بعفوه لنكوننا من الخاسرين

يارب ادخلنا الجنه برحمتك لا بعملنا...

ولا العمل يارب تعفي عنا ماسوينا شيء .....ايه ماسوينا شيء ...!!

كل ماشوف الشيوخ والدعاه ومجاهدتهم لانفسهم وانجازاتهم ومرابطتهم في الحرم والمساجد ...اقول وش سوينا حنا من طاعات تشفع لنا ...!!

كل وحده تسأل نفسها هل انتي راضيه عن نفسك من ناحية قربك من الله .... اكيد الجواب لا ومتأكده ..!!

كل مااتذكر ان هناك اشخاص يختمون القران في رمضان خمس او ست مرات ويختمونه في السنه اكثر من مره اقول وين انا منهم ...؟؟

تذكرت خالد بن الوليد عندما مسك المصحف بكى وقال ( اشغلنا عنك الجهاد في سبيل الله )

ونحن اليوم ماالذي اشغلنا عن القرأن .......؟؟؟

كل مااتذكر هااللي يقومون الليل ليليا خاشعين متضرعين وماتفوتهم السنن و صلاة الضحى

اقول وينا منهم البعض يادوب يصلي الفرض وياليت يوفي صلاته من سنه وتسبيح واستغفار ..!

كل مااشوف هااللي ذكر ربي مايطيح من لسانهم من استغفار وتهليل وتسبيح وحمد الله وشكره في كل وقت وحزه

اقول وينا منهم تعبت السنتنا من الكلام الفاضي والتعليق والغيبه والنميمه ...!

كل مااشوف الي يتصدقون ويتبرعون كل فتره وفتره وكل تفكيرهم في اخوانهم الفقراء المحتاجين ويسألون عنهم ويبحثون عنهم اقول وينا عنهم

راحت قلوسنا في اللبس والماركات والمطاعم والملاهي والعزايم والتكلف والفساتين المبالغ فيها

والولائم والسفر الممدوده فيها مالذ وطاب ومايجي في بالنا نتبرع على الاقل كل جمعه بخمسين ريال او وجبة غداء لعائله فقيره ..

او نكفل يتيم بميتين ريال كل شهر ماتجي شيء قدام تبذيرنا واسرافنا

لا لا حنا ماسوينا شيء ولا قدمنا لأخرتنا شيء .........ولا شكرنا الله حق شكره ولاعبدناه حق عبادته ..!!

مقصرين في جنب الله والله ثم والله مقصرين .......... وظلمنا انفسنا كثيرا كثيرا ... !!!

وغافلين مدري متى نصحى من غفلتنا .......... !!

اشغلتنا الدنيا عن ذكر الله ...!!

يومنا يروح كله في الطبخ والنفخ ومقابل التلفزيون والنت والجوال والزوج والعيال

تجي الاجازات وتروح في الأسواق والعزايم واللبس والمشاغل ..!!

اذا صلينا الفروض المطلوبه وتبعناها باالسنه والتهليل والتسبيح .... يااالله خلااص كاأتنا مسوين انجاز ..!!

والبعض يقول حنا اشوى من غيرنا الحمد لله ..........غيرنا يزني ويقتل ومايصلي وعاق و.. و...الخ

ليش نقيسها بهذا المنطق ..... ليش نحكم على انفسنا من هذا المنظور ..!!

ليش مانقول شوفي الشيخ الفلاني كيف يقضي يومه مابين مسجد وقران وتهجد

ليه مانقول شوفي الداعيه الفلانيه وقتها يروح مابين المصلى والندوات وسجادتها وصلاتها

ليه مانجاهد انفسنا ......ونكون دعاة انفسنا لكل خير يقربنا من الله

وين التزود باالطاعات والحسنات .....فتزودوا فان خير الزاد التقوى ..!!

اليس علينا ذنوب تستدعي منا التكفير ..!!

السنا بحاجه لحسنات يذهبنا سيئاتنا ..!

السنا بحاجه الى اعمال صالحه تقربنا من الجنه وتبعدنا عن النار..!

السنا بحاجه الى اعمال صالحه ترفع من مقامنا في الجنه ....

هل نسينا ان الجنه ادوار ومقامات واعلاها مقام الرسول عليه الصلاة والسلام الا نحب ان نكون بجواره ..!!

تأملوا هذا الكلام وطبقوه اخواتي : ( ان لم تستطع الاقلاع عن الذنوب فزاحمها باالطاعات )

اخواتي والله ماقصدت بموضوعي هذا اني اضيق خواطركم واذكركم باامور صعبه ومتعبه

بس كلام كثير متزاحم بداخلي قلت افضفض لكن

وايضا من باب التذكير ( ان الذكرى تنفع المؤمنين )

واللهم لك الحمد .... دائما اتذكر الموت ومابعد الموت

واحمد لله اني اتذكره حتى يزداد خوفي من الله واجاهد نفسي واحاول اقيدها عن كل مايغضب الله

فمن يذكر الموت حتما سوف يعرف ان الدنيا لاتساوي جناح بعوضه وانها فانيه لامحاله ..

وطوبى لمن عد العده وتزود لما بعد الموت ...!!

اسال الله ان لايشغلنا الا بطاعته وكل مايرضيه ...

وان يعننا على هذه الدنيا .......... ويهدينا لما يحبه ويرضاه من الاقوال والافعال ...!

دمتن بود عزيزاتي

جزاك الله خيرا حبيبتى
موضوع رائع

تحياتى لكى

شكرا لمروركم الرائع

» اللهم حرم النار على كل من قرأ هذا الموضوع
» المرأة كالحذاء!!!! لاتغضبي واقرأي الموضوع حتى نهايته:
» شكل غرز الكروشيه التونسى ( ادخلوا يا بنات عدلت الموضوع )
» مفارش جديدة شوفوا عدلت الموضوع 2012
» طريقة عمل مفرش العصفورة (شوفوا عدلت الموضوع)